ރަޝިޔާގެ ދެކުނު ބްލެކް ސީ އައްސޭރީގެ މަޝްހޫރު ރިޒޯޓް ރަށެއް ކަމަށްވާ އަރްޚިޕޯ-އޮސިޕޮވްކާގެ މީހުން ގިނަ ގޮނޑުދޮށަކަށް، ދުރު ރާސްތާގެ ހަމަލާދޭ ޑްރޯނެއް ވެއްޓި ގޮވުމުގެ ސަބަބުން ތިން ކުޑަކުދިން ހިމެނޭހެން ހަތް އާންމުން މަރުވެ، 60 އެއްހާ މީހުން ޒަޚަމްވެއްޖެ ކަމަށް ހަބަރުތައް ބުނެފިއެވެ.
ފަތުރުވެރިންގެ ފޯނުތަކުން ނަގާފައިވާ ވީޑިއޯތަކުން ފެންނަ ގޮތުގައި، ތިރިން އައި ޑްރޯން ގޮނދުދޮށަށް ވެއްޓި ބޮޑު ގޮވުމެއް ގޮވާފައި ވެއެވެ.
ރަޝިޔާގެ ކަމާބެހޭ ފަރާތްތަކުން މި ހަމަލާ އަކީ ޔޫކްރެއިންއިން ގަސްތުގައި ދިން ޓެރަރިސްޓް ހަމަލާއެއް ކަމަށް ބުނެއެވެ. ނަމަވެސް ހުޅަނގުގެ ޖާސޫސީ އިދާރާތަކުން ބުނާގޮތުގައި މި ޑްރޯންގެ އަސްލު އަމާޒަކީ އެ ސަރަޙައްދާ 25 މޭލު ދުރުގައި އޮންނަ، ސަލާމަތީގޮތުން ވަރުގަދަ ރަޝިޔާގެ ނޮވޮރޮސިއިސްކް ނޭވަލް ބޭސްއެވެ.
ޔޫކްރެއިންގެ އޮފިޝަލުން އެމީހުންގެ ދިފާޢުގައި ބުނީ، އެޤައުމުން ހަމަލާ ދެނީ ހަމައެކަނި ރަޝިޔާގެ އަސްކަރީ މަރުކަޒުތަކަށް ކަމަށާއި، އާންމުން އުޅޭ ސަރަޙައްދަކަށް މި ޑްރޯން ވެއްޓުނީ ރަޝިޔާގެ އަމިއްލަ ދިފާޢީ ނިޒާމުގެ ސަބަބުން ކަމަށެވެ.
ރަޝިޔާގެ ހެލްތު މިނިސްޓްރީން ކަށަވަރުކޮށްދޭ ގޮތުގައި، ގޮނޑުދޮށަށް ދިން ހަމަލާއާ ގުޅިގެން 21 މީހަކަށް އަދިވެސް ހޮސްޕިޓަލްގައި ފަރުވާދެމުންދާއިރު، އޭގެ ތެރެއިން ނުވަ މީހެއްގެ ހާލު ކްރިޓިކަލްއެވެ.