އިޤްތިޞާދު މި ޙާލަތުގައި އޮއްވައި މަޖިލީހުން އުޅެނީ ފޭލި ވިޔަން

‎‎ރާއްޖޭގެ އިގްތިސާދު ހީނަރުވެ، ބޭރު ފައިސާގެ ރިޒާވް ހުސްވުމުގެ ބިރު ބޮޑުވެ، ޒުވާނުންނަށް ވަޒީފާގެ ފުރުސަތުތައް ހަނިވަމުންދާ ދަނޑިވަޅެއްގައި، ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީއިން "ފޭލި ވިޔުމުގެ" މަސައްކަތް އާލާކުރަން ބައްދަލުވުންތައް ބޭއްވުމަކީ އިންތިހާއަށް ހެއްވާ އަދި ހިތާމަހުރި ކަމެކެވެ.

މިއަދުގެ ޑިޖިޓަލް ދުނިޔޭގައި، ފޭލި ވިޔެގެން އާމްދަނީ ހޯދައިގެން ދިރިއުޅުން ބިނާކުރާނެ ހަމަ އެކަކުވެސް ރާއްޖެއަކު ނެތެވެ. ‎ތާރީޚަށް ބަލާއިރު، ދިވެހިރާއްޖޭގައި ފޭލި ވިޔުމުގެ ސަގާފަތް އެންމެ ފުޅާދާއިރާއެއްގައި އޮތީ 17 ވަނަ އަދި 18 ވަނަ ގަރުނުގެ ތެރޭގައެވެ. ވަކިން ހާއްސަކޮށް ގދ. ގައްދޫ ފަދަ ރަށްރަށަކީ ކުރީގެ ރަސްރަސްކަލުންނަށާއި، ބޭރުގެ ވިޔަފާރިވެރިންނަށް ޚާއްސަ ދިވެހި ފޭލި (ލިބާހުގެ ތިރިއަށް އަންދާ ކަޅާއި ހުދުގެ ފޭލި) ވިޔެދިނުމަށް ދުނިޔޭގައިވެސް މަޝްހޫރުވި ރަށްރަށެވެ. ނަމަވެސް، އެއީ މީގެ ސަތޭކަހާ އަހަރު ކުރީގެ، ބޭރުން ފޮތި އިމްޕޯޓު ނުކުރެވޭ ޒަމާނުގެ މަސައްކަތެކެވެ.

‎މަޖިލީހުން މިފަދަ "ކަފުންވެފައިވާ" ސަގާފީ ކަންކަމަށް ވަގުތު ބޭކާރުކުރުމުގެ ބަދަލުގައި، މިއަށްވުރެ މާ ހަރުދަނާ، ގައުމީ ބޮޑެތި މައްސަލަތަކަށް އިސްކަންދޭންޖެހެއެވެ. ޒުވާނުންނަށް ހަގީގީ އާމްދަނީ ލިބޭނެ ދާއިރާތަކަށް ގާނޫނީ އޮނިގަނޑުތައް ހެދުމަށް މަޖިލީހުގެ ކޮމިޓީތަކުން ފޯކަސް ބަދަލުކުރަން އެބަ ޖެހެއެވެ.